Հայաստանի Հանրապետությունը անդամակցում է «Համաշխարհային հմտություններ» միջազգային կազմակերպությանը 2012 թվականից՝ ի դեմս ՄԿՈՒ զարգացման ազգային կենտրոնի:
ՄԿՈւ հաստատությունների ուսանողները հնարավորություն կունենան ներկայանալ և մրցակցել իրենց հմտություններով 65 այլ երկրների ուսանողների հետ՝ ազգային փուլում հաղթող ճանաչվելու դեպքում:
2015 թվականին Սան Պաուլոյում կկայանա «Համաշխարհային հմտություններ» 43-րդ միջազգային մրցույթը: Հայաստանը կմրցի հետևյալ 3 մասնագիտությունների գծով.
- Խոհարարություն
- Նորաձևության տեխնոլոգիա
- Ոսկերչություն
Սեփական հմտությունները հաստատելու համար` թեկնածուները նախ պետք է հաղթահարեն ազգային մրցույթը, որը կիրականացվի երկու փուլով՝ նախընտրական և հիմնական:
Մրցույթի նախընտրական փուլին մասնակցելու համար կարող են դիմել վերը նշված մասնագիտություններով ուսումնական հաստատություններում սովորող այն ուսանողները, որոնք`
- սովորում են երկրորդ կամ երրորդ կուրսում,
- մասնագիտական մոդուլներից ունեն 80 % գերազանց կամ լավ առաջադիմություն,
- ունեն անգլերեն և ռուսերեն լեզուների առնվազն լավ իմացություն:
Մրցույթին մասնակցելու համար պետք է ներկայացվեն հետևյալ փաստաթղթերը.
- ինքնակենսագրություն (CV),
- տեղեկանք հաստատության տնօրենի ստորագրությամբ՝ ուսանողի ուսումնառության տարվա և ուսման առաջադիմության վերաբերյալ (տեղեկանքի ձևը կցվում է),
- երաշխավորական 3 նամակներ՝ ուսանողի արտադրական ուսուցման վարպետների ինչպես նաև մասնագիտական հանդիսացող առարկաների դասավանողների կողմից,
- 2 լուսանկար՝ 3X4 չափի:
Մրցույթի նախընտրական փուլին մասնակցելու ուսումնական հաստատության ամփոփված հայտերը պետք է ներկայացնեն տվյալ հաստատության տնօրենները՝ Ֆրանս-հայկական մասնագիտական ուսումնական կենտրոն (Երևան, Տիգրան Մեծի 38, հեռ. 57-85-33, 57-84-34), մինչև ս.թ. հոկտեմբերի 18-ը:
Մրցույթի նախնական փուլում, որը տեղի կունենա ս.թ. հոկտեմբերի 22-ին, դիմորդները պետք է հաղթահարեն հետևյալ փուլերը`
- Գրավոր մասնագիտական թեսթ,
- Գործնական վարժություն, որը կպահանջի կատարել մասնագիտությանն առնչվող որևէ պարզ գործողություն,
- Հարցազույց, որի ընթացքում կստուգվի ինչպես դիմորդի հաղորդակցման և միջանձնային հարաբերությունների հմտությունները, իր մասնագիտության հանդեպ վերջինիս ունեցած վերաբերմունքը և մոտիվացիան, այնպես էլ վերջինիս` անգլերեն ու ռուսերեն լեզուների իմացության աստիճանը:
Մասնագիտական հանձնաժողովի կողմից` մրցույթի նախնական փուլը հաղթահարելու վերաբերյալ երաշխավորություն ստանալու դեպքում ուսանողը կմասնակցի ազգային մրցույթի հիմնական փուլին:
Ազգային մրցույթը կկայանա Երևանում՝ 2013թ. նոյեմբերի 2-րդ տասնօրյակում:
Յուրաքանչյուր մասնագիտության գծով հաղթող կճանաչվի մեկական ուսանող:
Երեք մասնագիտությունների գծով մրցույթում հաղթող ճանաչված ուսանողները հնարավորություն կստանան մասնակցել 2015թ. Սան Պաուլոյում կայանալիք «Համաշխարհային հմտություններ» մրցույթին:
